ស៊ុំ វិចិត្រា, អ្នកស្តាប់នៅប្រទេសកម្ពុជា
ព្រះរាជាណាចក្រកម្ពុជា
ជាតិសាសនា ព្រះមហាក្សត្រ
លិខិតជូនពរ
សូមអបអរសាទរខួបទី៧០ឆ្នាំនៃការបង្កើតវិទ្យុអូស្រ្តាលីផ្សាយសំរាប់តំបន់អាស៊ី-ប៉ាស៊ីហ្វិច
ក្នុងឱកាសគំរប់ខួបទី៧០ឆ្នាំសូម នៃការបង្កើតវិទ្យុអូស្រ្តាលីផ្សាយសំរាប់តំបន់អាស៊ី-ប៉ាស៊ីហ្វិចនៅឆ្នាំ២០០៩នេះ ខ្ញុំបាទឈ្មោះ ស៊ុំ វិចិត្រា ភេទប្រុស អាយុ២៩ឆ្នាំ សញ្ជាតិកម្ពុជា មានអាសយដ្ឋាននៅខេត្តកំពង់ឆ្នាំង ហើយបច្ចុប្បន្នស្នាក់នៅ និងបំពេញការងារក្នុងក្រុមហ៊ុនឯកជននៅខេត្តព្រះសីហនុ ព្រះរាជាណាចក្រកម្ពុជា សូមគោរពជូនពរដល់សមាជិក សមាជិកានៃវិទ្យុអូស្រ្តាលីផ្សាយ សំរាប់តំបន់អាស៊ី-ប៉ាស៊ីហ្វិច ជាពិសេសសំរាប់សមាជិក សមាជិកានៃវិទ្យុអូស្រ្តាលីផ្សាយជាភាសាខ្មែរសំរាប់តំបន់អាស៊ី-ប៉ាស៊ីហ្វិចទាំងអស់ ព្រមទាំងប្រជាពលរដ្ឋខ្មែរដែលកំពុងរស់នៅ និងកំពុងសិក្សានៅក្នុងប្រទេសអូស្រ្តាលីផងដែរ អោយទទួលបាននូវភាពជោគជ័យ រីកចំរើន ព្រមទាំងមានសុខភាពល្អ និងឈ្នះគ្រប់ឧបសគ្គ និងដោយឡែកសូមអោយដំណើរការផ្សាយរបស់វិទ្យុអេប៊ីស៊ី ទទួលបានភាពជោគជ័យជារៀងរហូត ហើយជាពិសេសក្នុងស្ថានភាពវិបត្តិសេដ្ឋកិច្ចដ៏លំបាកនេះ។
ម៉្យាងវិញទៀត សូមយកឱកាសនេះដើម្បីជំរាបជូនផងដែរថា តាមរយៈការផ្សាយជាភាសាខ្មែរនៃវិទ្យុអូស្រ្តាលី សំរាប់តំបន់អាស៊ី-ប៉ាស៊ីហ្វិចនេះ បានផ្តល់ផលប្រយោជន៍ និងចំណេះដឹងយ៉ាងច្រើនដល់ប្រជាជនកម្ពុជា ដូចជា បញ្ហាសង្គម សុខភាព សេដ្ឋកិច្ច និងនយោបាយ ជាពិសេសការវិវឌ្ឍន៍ថ្មីនៃស្ថានការណ៍នយោបាយនៅកម្ពុជារយៈពេលចុងក្រោយនេះ។ ជាមួយគ្នានេះដែរ តាមរយៈការផ្សាយនៃវិទ្យុអូស្រ្តាលី ក៏បានចូលរួមចំណែកផ្សព្វផ្សាយ និងពង្រឹងដោយប្រយោលនូវលទ្ធិប្រជាធិបតេយ្យដល់កម្ពុជា ហើយក៏បានចែករំលែកនូវពត៌មាន និងចំណេះដឹងដល់ប្រជាពលរដ្ឋខ្មែរនៅតំបន់ដាច់ស្រយាល ដែលពុំមានលទ្ធភាពទទួលបាននូវពត៌មានគ្រប់ជ្រុងជ្រោយ។ ក្រៅពីពត៌មានដែលទាក់ទងនឹងប្រទេសកម្ពុជា ប្រជាពលរដ្ឋខ្មែរ ក៏បានទទួលនូវពត៌មានថ្មីៗទាក់ទងនឹងស្ថានការណ៍នៅបរទេស ដូចជានយោបាយ ការវិវឌ្ឍន៍នៃសេដ្ឋកិច្ចបច្ចុប្បន្នដែលកំពុងមានវិបត្តិ និងពត៌មានផ្សេងៗទៀត។ សំរាប់រូបខ្ញុំផ្ទាល់វិញ ខ្ញុំបានទទួលមិនគ្រាន់តែពត៌មានដែលទាក់ទងនឹងសង្គម នយោបាយ សុខភាព និងសេដ្ឋកិច្ចប៉ុណ្ណោះទេ ប៉ុន្តែថែមទាំងបានហាត់រៀនស្តាប់ និងនិយាយភាសាអង់គ្លេសតាមបែបអូស្ត្រាលីទៀតផង។ ដោយសារតែការស្តាប់ និងនិយាយភាសាអង់គ្លេសរបស់ខ្ញុំនៅមានកំរិតទាបផងនោះ ដូចនេះក្រៅពីការហាត់ស្តាប់ និងនិយាយភាសាអង់គ្លេសក្នុងវិទ្យុអូស្ត្រាលីផ្សាយជាភាសាខ្មែរ នៅពេលទំនេរខ្ញុំតែងតែហាត់រៀនស្តាប់ភាសាអង់គ្លេសក្នុងវិទ្យុអូស្រ្តាលីដែលផ្សាយជាភាសាអង់គ្លេសជារៀងរាល់ថ្ងៃ ក្នុងគោលបំណងដើម្បីពង្រឹងចំណេះដឹងភាសារអង់គ្លេសអោយមានភាពល្អប្រសើរជាងមុន។
ដូច្នេះសរុបសេចក្តីមក ការផ្សាយជាភាសាខ្មែរនៃវិទ្យុអូស្រ្តាលីសំរាប់តំបន់អាស៊ី-ប៉ាស៊ីហ្វិច បានផ្តល់អត្ថប្រយោជន៍យ៉ាងច្រើនដល់ប្រជាជនកម្ពុជា ជាពិសេសលើផ្នែកសារពត៌មាន មានន័យថាប្រជាជនកម្ពុជាមានសិទ្ធិទទួលយកគ្រប់សារពត៌មានតាមដែលពួកគេត្រូវការ ម៉្យាងវិញទៀតបានធ្វើអោយកម្ពុជាមានសារពត៌មានកាន់តែសំបូរបែប។ ក្នុងឱកាសខួបទី៧០ឆ្នាំនេះផងដែរ ក្នុងនាមខ្ញុំជាពលរដ្ឋខ្មែរម្នាក់ ខ្ញុំសូមថ្លែងអំណរគុណដល់រដ្ឋាភិបាលអូស្រ្តាលី ក៏ដូចជាអគ្គនាយកនៃវិទ្យុអូស្រ្តាលី អេប៊ីស៊ី ដែលបានអនុញ្ញាតិអោយមានការផ្សាយពត៌មាន ជាភាសាខ្មែរសំរាប់តំបន់ អាស៊ី-ប៉ាស៊ីហ្វិចនេះ ហើយក៏សូមសំណូមពរដល់សមាជិក សមាជិកានៃវិទ្យុអូស្រ្តាលីទាំងការផ្សាយជាភាសាខ្មែរ និងជាភាសាបរទេសទាំងអស់ មេត្តាជួយផ្សព្វផ្សាយដល់ពិភពលោក អំពីប្រទេសកម្ពុជាតាមលទ្ធភាពដែលអាចធ្វើទៅបាន ដើម្បីធ្វើយ៉ាងណាអោយពិភពលោកស្គាល់អំពី អរិយធម៌ វប្បធម៌ និងធនធានធម្មជាតិដ៏សំបូរបែបរបស់កម្ពុជា ជាពិសេសអោយពួកគេស្គាល់អំពីប្រវត្តិសាស្រ្តរបស់កម្ពុជា ដើម្បីជាប្រយោជន៍ដល់ប្រជាជនកម្ពុជា។ ក្នុងនាមខ្ញុំជាពលរដ្ឋខ្មែរម្មាក់ ខ្ញុំមានមោទនភាពជាទីបំផុតដែលមានឮភាសាខ្មែរត្រូវបានផ្សព្វផ្សាយក្នុងតំបន់អាស៊ី-ប៉ាស៊ីហ្វិច តាមរយៈវិទ្យុអូស្រ្តាលី អេប៊ីស៊ីនេះ។
ដូច្នេះជាទីបញ្ចប់ខ្ញុំសូមជូនពរជាថ្មីម្តងទៀតដល់សមាជិក សមាជិកា នៃវិទ្យុអូស្រ្តាលីទាំងការផ្សាយជាភាសាខ្មែរ ព្រមទាំងជាភាសាបរទេស អោយទទួលបាននូវសុខភាពល្អ ជោគជ័យរាល់ភារកិច្ច និងជំនះរាល់ឧបសគ្គ។
សូមសមាជិក សមាជិកាទាំងអស់ទទួលនូវការគោរពរាប់អានដ៏ខ្ពង់ខ្ពស់អំពីខ្ញុំ។
ខេត្តព្រះសីហនុ ខែវិច្ឆិកា ឆ្នាំ២០០៩
ស៊ុំ វិចិត្រា
About the author
អ្នកស្តាប់វិទ្យុអូស្រ្តាលីនៅកម្ពុជា
